Daşkənddə ADA Universitetinin təqdimatı olub

26.02.2020 Off By admin

Daşkənddəki Dünya İqtisadiyyatı və Diplomatiya Universitetində (DİDU) Bakıdakı ADA Universitetinin təqdimatı keçirilib.

AZƏRTAC xəbər verir ki, təqdimatda universitetin professor-müəllim heyəti və tələbələr iştirak ediblər.

Universitetin prorektoru Saidmuxtar Saidkasimov DİDU barədə məlumat verib, bu ali məktəbin fakültələri, tələbələri və məzunları haqqında danışıb.

S.Saidkasimov ADA Universitetinin Tələbə qəbulu şöbəsinin əməkdaşı Aytəkin Hüseynovanı tələbələrə təqdim edib. Aytəkin Hüseynova ADA Universiteti haqqında ətraflı məlumat verib, universitetin 2006-cı il dekabrın 15-də Azərbaycan Xarici İşlər Nazirliyinin yanında fəaliyyətə başladığını diqqətə çatdırıb.

A.Hüseynova deyib: “2019-cu il fevralın 7-də Azərbaycan Prezidenti İlham Əliyevin Sərəncamı ilə universitetin 2014-cü ildə təsdiq olunan Nizamnaməsində bir sıra dəyişiklik edilib və bu ali məktəb Dövlət Universiteti statusu alıb. İndi universitetdə 2 min 300 tələbə oxuyur. Özbəkistana gəlişimin məqsədi ADA Universitetinə daha çox tələbə və magistr cəlb etməkdən ibarətdir”.

Sonra A.Hüseynova tələbələrin suallarına cavab verib.

Xəbəri paylaş: